Die Regering gaan beslis nog onderhandel oor die groenskrif vir grondhervorming, reken ’n politieke wetenskaplike.
“Die Regering begin altyd radikaal en vanuit ekstreme vertrekpunte, maar onderhandel dan oor die middelgrond. Selfs oor hierdie groenskrif (oor grond) gaan nog onderhandel word,” het dr. Piet Croucamp, politieke wetenskaplike van die Universiteit van Johannesburg, dié week gesê.
Onsekerheid geskep
Croucamp, wat die genooide spreker by Overberg Agri se boeredag op Roodebloem was, meen die onbestendigheid wat daar in die land en binne die regerende party heers, skep onsekerheid in die landbou en die mynbedryf.
Tog het die burgerlike samelewing in Suid-Afrika al begin leer om met die onbestendigheid saam te lewe en demokrasie op te eis.
Hy het benadruk hoe belangrik dit vir die demokrasie in Suid-Afrika is dat die burgerlike samelewing en groepe, soos die georganiseerde landbou, gedurig druk op die Regering uitoefen.
Boere is 'moeilike customers'
Hy het ook bygevoeg dat mnr. Gugile Nkwinti, Minister van Landelike Ontwikkeling en Grondhervorming, boere beskou as “moeilike customers wat ’n harde bargain dryf”. Croukamp sê dít is goeie eienskappe om in ’n demokrasie te hê.
Die feit dat die stof nog nie gaan lê het oor nasionalisering en eiendomsreg nie, skryf Croukamp toe aan die feit dat die Suid-Afrikaanse samelewing op kompromie gebaseer is, wat beteken dat alles gedurig weer onderhandel kan word.
“Dis die probleem. Ons onderhandel die hele tyd oor stelsels. Ons het nie genoeg konsensus in die politiek om die Grondwet te laat werk nie. As ons dit gehad het, het ons meer bestendigheid in Suid-Afrika gehad.
Eiendomsreg
“Nasionalisering en eiendomsreg moes lankal nie meer kwessies gewees het nie. Ons het mos in die Grondwet ingeskryf dat eiendomsreg verskans word. Hoekom onderhandel ons nog daaroor?”
Croukamp sê, soos die onbestendigheid, maak die gedurige heronderhandeling beleggers baie onseker. Hy het nietemin gesê “rou nasionalisering soos in Zimbabwe” gaan nie in Suid-Afrika gebeur nie, en hy glo eweneens dat die beperkings op grondbesit wat nou in die groenskrif is, ook vaer gaan word.
Hy is steeds optimisties oor Suid-Afrika – veral omdat die Regering steeds reageer op, en intens bewus is van die druk wat nie-regeringsorganisasies, die burgerlike samelewing en die boeregemeenskap op hom plaas.
Kliek op die PDF hierby aangeheg om die groenskrif vir grondhervorming te lees.
31 Augustus 2011
