Boere wat op regeringsgrond boer is die josie in vir die Regering wat hulle met regsaksies dreig, en skuldeisers hulle bel oor huurgeld wat nie betaal is nie.
Mnr. Aggrey Mahanjana, sekretaris-generaal van die African Farmers’ Association of South Africa (Afasa), sê dis ’n groot skok vir die organisasie, aangesien hulle ’n onderneming van mnr. Gugile Nkwinti, Minister van Landelike Ontwikkeling en Grondhervorming, en mnr. Mdu Shabane, direkteur-generaal (DG) van die Departement van Landelike Ontwikkeling en Grondhervorming, gekry het dat die “teistering” sal stop.
Shabane is einde verlede jaar geskors rakende sekere prosedurele tekortkominge wat nie by sommige grondhervormingsprojekte gevind is nie. Geen korrupsie of die steel van fondse is hierby betrokke nie. Me. Leona Archary, die adjunkdirekteur-generaal vir landelike infrastruktuur-ontwikkeling, neem as DG waar.
Ná uitmergelende droogte
Mahanjana sê dié boere begin net weer kop optel ná ’n uitmergelende droogte en pleks daarvan dat die departement die organisasie nader, gaan hy voort om hierdie soort eise te stel. Hy sê ook dat die Regering voortgaan om kommer rakende die regeringsplase wat reeds aangemeld is, te ignoreer.
“Baie boere op regeringsplase is radeloos. Sommige is steeds sonder huurooreenkomste en kwalifiseer dus as plakkers. Sommige het nog nie eens nasorg ontvang sedert hulle op die plase geplaas is nie.”
Afasa is van plan om die teistering van hulle lede oor huurgeld met pres. Jacob Zuma te bespreek en ’n weg vorentoe te vind.
