Regstappe word teen die Regering oorweeg omdat hy nie op versoeke vir hulp aan Suid-Afrikaanse boere in Zimbabwe reageer nie, sê AfriForum.
Luidens ‘n verklaring het dié organisasie ‘n versoek aan die Departement van Handel en Nywerheid gestuur waarin hy aandring dat die Regering boere in Zimbabwe moet beskerm.
Die organisasie sê hy oorweeg nou verdere regsoptrede aangesien geen terugvoer op ’n brief van 9 Junie 2010 ontvang is nie. Die spertyd was 15 Junie.
Hernude aanvalle op boere
Dié aansoek het gevolg nadat Zimbabwiese boere die afgelope drie weke onder verskerpte aanslae deur plaasbesetters geteiken is. In die jongste voorval is ‘n bejaarde egpaar op hul plaas in die Somabhula-omgewing erg aangerand. Volgens me. Lauren Nixon, die egpaar se dogter, het die groep ook sewe ander boere in die distrik aangerand.
Volgens Nixon word Phillip en Ellen Hapelt ná die aanval op ‘n daaglikse basis deur ‘n mnr. Mangena, wat ‘n parlementslid in die Mberengwa-omgewing is, gedreig. Mangena het Maandag (12 Junie 2010) die plaaswerkers by die plaashuis laat vergader waar hy vir die werkers gesê het dat sy geduld min raak met die egpaar, en dat hy van plan is om met ‘n verskerpte aanval die egpaar met erge geweld van die plaas te verdryf.
Die plaaslike owerhede tree blykbaar nie teen die Mangena of die aanvallers en besetters op nie, ten spyte van hofbevele in dié verband.
Geregtig op hulp
AfriForum sê na aanleiding van die Bippa-handelsooreenkoms wat die SA Regering verlede jaar onderteken het en wat tot ‘n hofbevel in die Noord-Gautengse Hooggeregshof verklaar is, het die SA Regering onderneem om die regte en regsmiddele van slagoffers van Zimbabwe se onwettige onteieningsprogram te handhaaf. Die ooreenkoms het ook bepaal dat dié Suid-Afrikaners op beskerming geregtig is.
Toekenning deur koningin
Intussen verwelkom die organisasie ‘n toekenning wat Koninging Elizabeth onlangs aan ‘n aktivis vir Zimbabwese boere toegeken het. Mnr. Ben Freeth, wat ook die skiet van die dokumentêre film Mugabe and the White African behartig het, het ‘n MBE (Member of the British Empire) van die koningin ontvang.
Die toekenning is volgens die monarg se verjaarsdaglys van 2010 gedoen “op grond van dienste aan die boerderygemeenskap van Zimbabwe gelewer”.
17 Junie 2010
