Ná ‘n jarelange stryd teen kanker het regter Fikile Bam, regter-president van die Grondeisehof, gesterf.
Luidens ‘n berig op Mail & Guardian Online het die 74 jarige Bam Sondag, 18 Desember 2011, in ‘n hospitaal in Johannesburg gesterf. Hy het sedert 1995 sy posisie by die grondeisehof beklee.
Bam is op 18 Julie 1937 in Tsolo in die Oos-Kaap gebore. In 1960 is hy as politieke gevange aangekeer ná ‘n staat van nood in die land verklaar is. Hy is ‘n vonnis van 11 jaar opgelê, waartydens hy saam met oud-pres. Nelson Mandela op Robbeneiland aangehou is.
Medelye
Intussen het mnr. Johannes Möller, voorsitter van Agri SA, die organisasie se medelye met Bam se familie uitgespreek. Hy sê Bam was ‘n man van integriteit, wat altyd sy land tot diens was en wie altyd waardig en beginselvas opgetree het. “Hy was besonders geïnteresseerd in die sensitiewe gronddebat en het ‘n reuse bydrae gemaak deur sy insette, begrip en die uitsprake wat hy gelewer het. Hy was baie toeganklik en hy sal gemis word.”
Loopbaan
Bam het na hy uit die tronk vrygelaat is, twee grade in regte aan die Universiteit van Suid-Afrika voltooi. In 1992 is Bam as die kommissaris van die Goldstone Kommissie aangewys, en hy was ook ‘n advokaat van die Hooggeregshof van Suid-Afrika en die Transkei. Hy het ook as ‘n mediator opgetree tydens 1994 se eerste demoktariese verkiesing.
Bron: Mail and Guardian
19 Desember 2011
