Regulasies gaan glo ingestel word oor inspuitings van soutwater in hoender ná navorsing in dié verband, sê die Rooivleis Produsente-organisasie (RPO).
Luidens die organisasie se jongste nuusbrief is dié een van die moontlike uitkomste van navorsing wat prof. Arno Hugo van die Universiteit van die Vrystaat namens die RPO gedoen het. Volgens die nuusbrief is die projek deur die RPO geïnisieer en dit is gedra deur finansiering uit die bedryf.
Volgens die navorsing lei die inspuiting van soutwater-oplossings in hoendervleis in Suid-Afrika tot uitermatige vogverlies tydens die gaarmaak of kookproses. Dit lei glo ook tot verlaagde voedingswaarde, aangesien vinnige gevriesde hoenderprosies – wat met beheerde porsies wat nie ingespuit is nie vergelyk is – minder vet, proteïene en energie bevat.
“Soutwateroplossing inspuitings lei tot verhoogde sout in hoender, wat hoë sodiumvlakke veroorsaak wat ‘n risiko vir verbruikers wat aan hipertensie lei, kan wees,” lui die nuusbrief.
Nie bewus van dié navorsing
Intussen sê die Suid-Afrikaanse Pluimveevereniging (SAPA) hy is nie bewus van dié navorsing nie en is ook nie deur die RPO of Hugo in dié verband gekontak nie.
“Dit is vir ons snaaks dat ‘n ander landbou-organisasie die navorsing ondersteun wat ‘n ander vleissoort in ‘n slegte lig stel,” sê mnr. Kevin Lovell, die hoof uitvoerende beampte van SAPA. “Ons het nie die verslag gesien nie, en kan slegs kommentaar lewer oor dit wat ons in die RPO se nuusbrief sien.”
Volgens Lovell stem hulle nie met Hugo saam dat inspuitings tot vogverlies tydens die gaarmaakproses lei nie. “Alle vleis verloor vog en word kleiner wanneer dit gaargemaak word. Wanneer ‘n vars hoender gaargemaak word, gaan sowat 30% van die kookgewig verlore.”
Hy sê wat die risiko’s vir verbruikers aanbetref, kan alle oplossings nie onder dieselfde kam geskeer word nie, aangesien sommige maatskappye glad nie tafelsout in hulle oplossings gebruik nie. Lovell sê die praktyk van inspuitings in hoender word toegepas omdat dit hoender meer toeganglik vir arm Suid-Afrikaners maak. “Gevriesde hoender kos deesdae R15 tot R16 per kilogram, terwyl vars hoender R24 tot R25 kos.”
Hy sê hulle is tans in gesprekke met die departement oor die moontlikheid van ‘n gedragskode vir die bedryf.
Swak lig nie die idée
Intussen sê mnr. Gerhard Schutte, die hoof uitvoerende beampte van die RPO, die navorsing is nie onderneem om ‘n ander produk in ‘n swak lig te stel nie. “Ons wil nie landboukommoditeite teen mekaar afspeel nie, maar ons meen die verbuiker moet weet wat hy koop.”
Hy sê die navorsing is nie aan die SAPA gekommunikeer nie. Hugo het die navorsing glo sowat twee jaar gelede onderneem, en Schutte sê sover hy verstaan, is Hugo deur die staat genader rakende die regulasies.
Landbou.com kon nog geen terugvoer van die departement af kry oor of die regulasies wel oorweeg word nie.
26 November 2010
