’n Rekordprys van R97,50/ kg vetwol (of R129,17/kg skoonwol) is op die weeklikse wolveiling betaal vir drie bale wol van 16,5 mikron met ’n skoonopbrengs van 75,5%.
Dit het behoort aan mnr. Ray Sephton van Fascally Farms in die distrik Barkly-Oos. Die vorige hoogste prys was R87/kg vetwol wat die vorige week behaal is.
Die wolmark het teruggesak en Cape Wools se Merino-aanwyser het op dié veiling 2% laer op R67,28/kg (skoonwol) gesluit. Dit is nietemin steeds 16% hoër as die openingsveiling. Die aanwyser het laer gesluit hoofsaaklik weens die laer pryse wat die sterker tipes wol behaal het. Die pryse van die meeste tipes fynwol het egter gestyg.
Altesame 11 713 bale is aangebied waarvan 98% verkoop is.
Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron daal met 0,8% tot R86,11/kg, 20 mikron verswak met 1,5% tot R71,26/kg, 21 mikron daal met 1,7% tot R67,35/kg en 22 mikron was 1,1% goedkoper op R64,97/kg.
Sowat 9 000 bale sal volgende week aangebied word.
18 November 2010
