Die jongste rentekoersverlaging kan die landbou tot R260 miljoen per jaar bespaar, sê Agri SA.
Luidens ‘n verklaring het me. Gill Marcus, president van die Reserwebank, aangekondig dat rentekoerse met 0,5% of 50 basispunte verlaag gaan word.
Dié verlaging sal vandag (10 September), van krag wees. Dit sal die repokoers op 6% te staan bring, terwyl die prima-uitleenkoers dan 9,5% sal wees.
Groot verligting vir boere
Mnr. Dawie Maree, ekonoom by Agri SA, sê tans beloop die landbou se totale skuldlas sowat R52 miljard. Hy sê dié verlaging sal ‘n verligting van sowat R260 miljoen per jaar tot dié skuldlas tot gevolg hê. “Dié is net boere se skuld, dit sluit byvoorbeeld landbou-ondernemings uit. Sowat 96% daarvan is plaasskuld,” verduidelik Maree.
Hy sê sowat 70% van dié bedrag word aan kommersiële banke geskuld, en as dié verlaging ingestel word sal dit groot verligting vir boere bring.
Die rede vir die verlaging
Een van die grootste redes vir die daling is die laer Verbruikersprysindeks (VPI) in Julie aangeteken. Die VPI vir Julie het op 3,7% te staan gekom, teenoor ‘n syfer van 4,6% in Mei vanjaar.
Marcus sê na verwagting sal die inflasiekoers tot en met 2012 binne die 3% tot 6%-teikenband bly, en ‘n gemiddelde inflasiekoers van 4,8% word vir 2011 verwag.
Volgens Marais het die sterk wisselkoerse van die rand, veral teenoor die dollar, ook tot dié daling en die inflasiebewegings bygedra.
10 September 2010
