Bykans R1 miljard se vergoeding vir restitusie-eise is die afgelope ses maande deur die Kommissie vir die Herstel van Grondregte uitbetaal.
Mnr. Jeff Radebe, Minister in die Presidensie, sê die wiele van restitusie is in beweging om die waardigheid van diegene te herstel wat die onregte van apartheid moes verduur.
Radebe het die media toegespreek ná afloop van die tweeweeklikse kabinetvergadering. Hy het gesê van die 112 grondeise wat afgehandel is, is 57 in landelike gebiede, waar altesaam 2 553 mense in 467 huishoudings voordeel trek.
Grond-eis
Fase twee van die afhandeling van die grond-eis van die Masinenge-gemeenskap en die Mtshali-familie eis, is onlangs goedgekeur en ontvangsbewyse vir finansiële vergoeding is aan die begunstigdes oorhandig. Die totale vergoedingswaarde van die Masinenge-eis is R7,1 miljoen en 64 huishoudings is geïdentifiseer as die begunstigdes wat van hulle grond ontneem is.
Die Departement van Landelike Ontwikkeling en Grondhervorming het onlangs aangedui dat geld en hulpbronne wat bedoel was vir die instel van nuwe grondeise, aangewend sal word vir die navorsing en afhandeling van grondeise wat teen einde Desember 1998 ingedien is.
Die Kommissie vir die Herstel van Grondregte het besluit om hierdie roete te volg nadat die Grondwethof die gewysigde Wet op die Herstel van Grondregte (Wet 15 van 2014) as ongeldig verklaar het en die Parlement 24 maande gegee het om sy tekort aan openbare verhore reg te stel.
Navorsing vir alle eise
Mnr. Thami Mdontswa, adjunk-grondeisekommissaris, het vroeër die Parlement se portefeuljekomitee vir landelike ontwikkeling en grondhervorming ingelig dat beoog word om die navorsing van alle eise wat teen einde 1998 ingedien was teen 31 Maart 2017 te voltooi. Die kommissie wil ook binne die volgende 24 maande al hierdie eise vir afhandeling gereed kry.
Op 31 Maart vanjaar was 7 419 eise uitstaande. Hiervan was 2 763 in die navorsingsfase, 280 moet deurgegaan word of dit vir restitusie kwalifiseer en 4 376 was in die onderhandelingsfase.
Radebe het ook aangedui dat 54 400 hektaar landbougrond aangekoop is en 51 188 hektaar landbougrond ook aan kleinskaalse boere toegestaan is. Altesaam 6 530 hektaar landbougrond is aangekoop en aan plaasbewoners en woonwerkers toegestaan.
