Boere het die geleentheid om ’n stabiliserende mag in die land te wees, te midde van regeringspolitiek wat tot die krediet-afgradering van die Suid-Afrikaanse ekonomie gelei het.
Só reken mnr. Louis Meintjes, voorsitter van die TLU SA, wat in ’n verklaring gewaarsku het teen die gevare van hoë voedselpryse wat ’n sterker moontlikheid is weens die kredietagentskap Standard and Poor (S&P) se besluit om Suid-Afrika se gradering na rommelstatus te verander.
“Al prioriteit wat daar nou vir die landbou is, is om so bekostigbaar moontlik voedsel op die tafel te sit vir die land se inwoners. Die rommelstatus gaan ’n invloed op voedselpryse hê, en lesse in Egipte het al getoon dat hoë, onbekostigbare voedselpryse tot revolusie kan aanleiding gee,” aldus Meintjes.
Volgens Meintjes moet die landbou hom onttrek van regeringspolitiek, sodat die ANC alleen verantwoordelikheid moet neem vir die situasie waarin Suid-Afrika homself bevind. “Ons as boere moet net doen wat ons moet doen, en dit is om te boer. Ons doen dit al lank reeds ten spyte van die ANC-regering en sy beleid, en nie danksy ’n ANC-regering nie.”
Zuma moet verduidelik
Hoewel ’n swakker rand weens die rommelstatus goeie nuus kan wees vir boere wat hul produkte na die buiteland uitvoer, is onstabiliteit van die breër ekonomie tot nadeel van die landboubedryf as geheel.
Mnr. Johannes Möller, voorsitter van Agri SA, het pres. Jacob Zuma se rol in die kredietgradering-sage veroordeel. “Om te herstel van ’n afgradering verg ’n besondere poging van die politieke sowel as ekonomiese sektore van die samelewing. Die president moet nou verduidelik wat hy gaan doen om Suid-Afrika uit sy rommelstatus-situasie te kry,” het Möller gesê.
“Agri SA is bekommerd oor die huidige verwikkelinge en die uitwerking wat dit het op politieke en ekonomiese sekerheid en stabiliteit in die land. Politieke en ekonomiese leierskap is die enigste manier waarop ons vorentoe kan beweeg.”
