Afrika is nie 'n maklike plek om in sake te doen nie, maar dit is belangrik vir Suid-Afrikaanse ondernemings om hul sake hier uit te brei.
Om ’n onderneming in Suid-Afrika se stadig groeiende ekonomie te probeer uitbrei, is onvolhoubaar, sê dr. Martyn Davies, hoof- uitvoerende beampte van Frontier Advisory, 'n navorsings- en strategie-onderneming wat in opkomende markte spesialiseer.
Hy het by die Produce Marketing Association (PMA) se Fresh Connections-konferensie in Pretoria gesê Suid-Afrika is soos die Japan van Afrika, met stadige ekonomiese groei, maar uitstekende maatskappye.
Sowat 20 jaar gelede het Suid-Afrika vir 50% van Afrika se bruto binnelandse produk gesorg, vandag is dit rondom 20%.
Afrika bied aan Suid-Afrikaanse ondernemings geleenthede om inkomste te bou en aandeelhouerswaarde te skep. Dit is belangrik om te besef Afrika bestaan uit verskeie gefragmenteerde markte.
Verder behels die opkomende middelklas dikwels slegs 'n elite groep mense terwyl armoede andersins toeneem, soos in Angola en Nigerië.
Sommige lande sal volgens Davies altyd mislukte state bly, soos die meeste van die lande in Noordwes-Afrika, terwyl ander die potensiaal het om suksesverhale te word, soos Rwanda en Ethopië. Lande moet werk om groei te bewerkstellig. “Partye state kan dit nie regkry nie.”
Die Wêreldbank-indeks wat meet hoe maklik dit is om sake in 'n land te doen, wys die meeste Afrika-lande gaan eerder agteruitgaan as om vordering te maak. Mauritius en Rwanda is van die min uitsonderings. Davies sê Afrika se ekonomieë is baie weerloos omdat hulle nie gediversifiseer is nie en afhanklik is van enkele kommoditeite.
Mnr. David Hodnett, adjunk-hoofuitvoerende beampte van Barclays Africa-groep, sê as die neiging dat Afrika meer kos invoer as wat hy uitvoer, nie omgekeer kan word nie, gaan boere op die vasteland die geleentheid misloop om voordeel uit die groeiende middelklas te trek.
Kommersiële boere is volgens hom in 'n beter posisie omdat kleinskaalse boere sukkel met die ingewikkeldheid van die varsprodukteketting.
