Vlug EK 772 van Doebai het op Donderdagoggend 22 September altesaam 120 toutrekkers, sewe wêreldklubkampioenskapmedaljes en vier wêreldkampioenskapmedaljes op die internasionale lughawe in Kaapstad afgelaai.
Twee van die goue medaljes was vir die o.19-seun- en o.19-meisiespan wat 18 van die wêreld se beste spanne in die onlangse wêreldkampioenskap in Holten, Nederland, uitgestof het. Van 75 lande wat amptelik by die wêreldliggaam vir toutrek (TWIF, oftewel Tug of War International Federation) geregistreer is, het net die top-19, waaronder Suid-Afrika, aan die wêreldkampioenskap deelgeneem.In die wêreldklubkampioenskap het o.19-seunspan van Oakdale en die gemengde o.19-span van Swellendam in die Wes-Kaap ook goud gewen.
Mnr. Anton Botha, president van SA Toutrek, sê die vier dae lange wêreldkampioenskap bestaan uit twee kampioenskapkompetisies. Die eerste twee dae word die wêreldklubkampioenskap gehou, waartydens die beste toutrekklubs meeding om die titel as wêreldkampioenklubspan. Die volgende twee dae ding lande se nasionale man-, vroue- en gemengde spanne mee. Gemengde spanne bestaan uit vier vroue en vier mans.
Daar word in 13 kategorieë deelgeneem: o.19-seuns (560 kg), o.19-meisies (480 kg), o.19-gemeng (520 kg), o.23-mans (600 kg), o.23-vroue (500 kg), o.23-gemeng (560 kg), senior vroue liggewig (500 kg), senior vroue swaargewig (540 kg), senior mans liggewig (560 kg), senior mans middelgewig (640 kg), senior mans ligswaargewig (680 kg), senior mans swaargewig (720 kg) en senior gemeng (580 kg).
Suid-Afrika se klubspanne het sewe medaljes in die wêreldklubkampioenskap gewen. Breërivier se gemengde o.19-span, Drostdy se o.19-vroue en Goudini se o.23-vroue het almal silwer gewen. Swellendam se o.19-meisies en Valsbaai se o.23- gemengde span het brons gewen.
In die wêreldkampioenskap het Suid-Afrika sê o.23-mans en o.19- gemengde span ook brons gewen.
