Die gebrek aan deelname deur die jeug in die landbousektor is ’n groot bron van kommer, sê mnr. Pravin Gordhan, Minister van Finansies.
“Die gemiddelde ouderdom van ’n Suid-Afrikaanse boer wissel van 56 tot 62 jaar. Dít bedreig die volhoubaarheid van die sektor,” het Gordhan op die bekendmaking van die Land Bank se finansiële resultate gesê.
“Daarom is dit belangrik om die jeug by die landbou te betrek.” Gordhan sê dit is nie waar om te redeneer dat die jeug nie wil werk nie.
“Tot dusver is sowat 9 000 jeugdiges deur die Departement van Landelike Ontwikkeling en Grondhervorming se landelike jeugdienste-korps opgelei. Dit is ’n voorbeeld hoe werkloosheid onder die jeug opgelos kan word.”
Talle aansoeke
Volgens hom word die jeug se belangstelling in dié program bewys deur die feit dat meer aansoeke daarvoor as vir enige soortgelyke programme ontvang is. Gordhan sê Suid-Afrikaners moet ontslae raak van die eng denkraam waaraan hulle gewoond was.
“Ons moet nuwe, innoverende maniere vind om te werk. Ons kreatiwiteit moet binne ons eie konteks toegepas word. Hoe kan die Regering en die private sektor saamwerk om werksgeleenthede te skep? Niemand het die monopolie op die oplossing nie. Dít is hoekom almal se samewerking nodig is.”
26 Augustus 2011
