Indien Suid-Afrika ’n goed gebalanseerde reguleringsregime het, hoef hy nie hoender in te voer nie, het mnr, Kevin Lovell, hoof van die SA Pluimveevereniging, gesê.
Die plaaslike hoenderbedryf beleef ’n krisis – hoofsaaklik weens die invoer van hoender uit die Europese Unie.
Lovell, wat om hulp vir die bedryf by die Parlement se portefeuljekomitee vir landbou, bosbou en visserye gepleit het, het uitgewys dat Suid-Afrika 1 069 direkte en indirekte werke verloor vir elke 10 000 ton hoendervleis wat hy minder produseer. Indien die land nie hoender invoer nie, kan 50 000 werke geskep word.
Hy het gesê die oorlewing van die bedryf, die land se voedselsekuriteit, die landelike ekonomie en 130 000 werkers en hulle gesinne, is nou grootliks in die hand van die Regering. “As die Regering ons help om te oorleef, kan ons groei en ’n aansienlike bydrae tot die land se toekoms maak.”
(Lees ook: Moenie ons werkgeleenthede uitvoer)
Werkverliese het reeds begin:
* Rainbow Chickens, wat opgeneem is in die voedselgroep RCL Foods, het in Januarie 1 350 werkers, insluitend bestuurders, afgelê.
* Country Bird gaan sy abattoir in Mahikeng sluit met die verlies van 939 direkte en 1 605 indirekte werke.
* Mike’s Chickens, ’n bemagtigingsplaas, is reeds onder sakeredding.
* Daybreak, die eerste beduidende produsent in swart besit, is in groot moeilikheid.
Lovell het die EU se storting van hoenderstukke aan die been beskryf. Wes-Europa veral het ’n groot voorkeur vir die wit vleis van hoender of borsvleis wat meebring dat hoender aan die been ’n “neweproduk” is waarvan ontslae geraak moet word.
Hy het gesê Europa se mark is só verwring dat hy borsvleis moet invoer. Hy verduidelik dat selfs al eet Europeërs ál die dele van die hoender, sal daar steeds ’n ooraanbod wees want hulle produseer te veel hoenders as wat hulle mense wil eet. Boonop is hulle produksiekoste hoër as die res van die wêreld. “Hulle het ’n probleem. Hulle produseer te veel en eet nie alles nie en maak dit die arm mense se probleem.”
Enige span het altyd rowwe spelers
Dit het me. Rosina Semenya, voorsitter van die Parlement se portefeuljekomitee vir landbou, bosbou en visserye, laat wonder waarom Suid-Afrika nie borsvleis in die EU stort nie. “Ons wil wêreldwye spelers wees en enige span het altyd rowwe spelers. So waarom stort ons nie terug nie. Ons moet hoenders stort tot hulle huil.”
Lovell het uitgewys dat alles nie verlore is nie en dat die bedryf gehelp kan word deurdat ’n reguleringsraamwerk daargestel word wat groei en volhoubaarheid in die plaaslike bedryf verbeter ondersteun. Dit moet ook buitensporige subsidiëring en storting van ontwikkelde lande voorkom.
Invoere moet ook gebaseer wees op die nasionale behoefte en nie die gierigheid van invoerders nie. Dit behoort met die helfte verminder word. “Ons hoef nie hoender in te voer nie. Ons kan elke hoenderdeel produseer wat Suid-Afrikaners wil eet.
