Met sy wind-atlasneem Suid-Afrika nou die voortou in die ontwikkeling van só ‘n model vir die wêreld, sê me. Dipuo Peters, Suid-Afrika se Minister van Energie.
Peters het tydens die Windenergie-seminaar by Gallagher Estate in Midrand in Gauteng gesê met die skep van die wind-atlas verbind Suid-Afrika hom opnuut tot die ontwikkeling van skoon energie vanaf die wind en son.
Die wind-atlasprojek sal vier jaar duur en die eerste tien maste is reeds in die Noord-, Suid- en die Oos-Kaap opgerig. Die suksesvolle ontwikkeling van tegnologie vir windenergie is afhanklik van akkurate kennis en die wind-atlas sal ’n groot bydrae in dié verband maak.
Volgens mnr. Dan Frederiksen, Deense ambassadeur in Suid-Afrika, is dit belangrik dat Suid-Afrika se boere, grondeienaars en gemeenskappe voordeel trek uit hernubare energieprojekte in dié land. “Dwars oor die wêreld, en veral in Denemarke, kan windenergie ’n belangrike rol speel in die ekonomiese ontwikkeling van ’n land se armer gebiede omdat dit ’n finansiële bydrae lewer én werkskepping bevorder. Suid-Afrika behoort geen uitsondering te wees nie,” het Frederiksen gesê.
Meer besonderhede oor die wind-atlas is te vinde op die webwerf www.wasa.csir.co.za en om inligting af te laai kan internetbesoekers kyk na http://wasadata.csir.co.za/wasa1/WASAData.
29 September 2010
