Dié besluit is geneem ten spyte van vordering wat sedert Oktober 2021 gemaak is. Die FATF het destyds ’n verslag gepubliseer waarin hy gebreke in Suid-Afrikaanse wetgewing uitgelig en 67 regstellende stappe aanbeveel het.
Luidens ’n verklaring deur die tesourie het die FATF op ’n vergadering in Morokko op 13 Januarie vanjaar erkenning aan Suid-Afrika se vordering gegee. Daar is egter bevind dat Suid-Afrika meer vordering moet maak met agt strategiese gebreke wat te doen het met die doeltreffende toepassing van wetgewing rondom geldwassery en die finansiering van terrorisme.
Mnr. Enoch Godongwana, minister van finansies, het volgens die tesourie mnr. Raja Kumar, president van die FATF, ingelig dat die Suid-Afrikaanse kabinet sy samewerking sal gee om dié oorblywende tekortkominge aan te pak en wetgewing doeltreffender toe te pas.
“Die regering erken dat in Suid-Afrika se belang is om dié kwessies op te los en dat dit strook met ons bestaande verbintenis tot die herbou van instellings wat gedurende die tydperk van staatskaping verswak is. Die doeltreffendheid van hierdie instellings is noodsaaklik om misdaad en korrupsie te bekamp,” lui die verklaring.
Die tesourie noem egter dat geen tekortkoming direk verwant hou met voorkomende maatreëls wat die finansiële sektor betref nie. Dit word beskou as bewys van die vordering wat gemaak is met die toepassing van ’n risikogebaseerde benadering tot die toesighouding van banke en versekeraars.
“Die nasionale tesourie verwag dus dat die verhoogde monitering ’n beperkte impak sal hê op finansiële stabiliteit en die koste van besigheid doen met Suid-Afrika. Dit sal, egter, streng gemonitor moet word.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
