Vyftien studente doen nou praktiese opleiding by ’n top landboukollege in Denemarke as deel van ‘n vennootskap tussen Suid-Afrika en Denemarke.
Die leerders van Noordwes en die Vrystaat se opleiding by die grootste en oudste landboukollge in Denemarke, Dalum Landboukollege, strek tot Junie 2015.
Mnr. Senzeni Zokwana, Minister van Landbou, Bosbou en Visserye en sy Deense eweknie, mnr. Dan Jørgensen, het vroeër die week in Pretoria vergader, waar opleidingsbande tussen die twee lande versterk is.
Zokwana sê ’n besluit is geneem im vaardighede onder jongmense te verbeter. “Die hele sektor stem saam dat vaardigheid die ruggraat van die landbou is.”
Hy sê op die vergadering het hy benadruk dat Suid-Afrika uitdagings rakende werkloosheid het, wat aggressiewe ingryping benodig. Hulle het dit begryp en onderneem om plaaslike leerders toe te laat om by die beste te leer.
Die kurrikulum sluit ’n vaardigheidsprogram vir die voornemende boer en ’n program vir plaasbestuurder in. Hierdie kursus is 20 weke lank, waarna die student praktiese opleiding kry. Die landbougerigte gedeelte sluit in studies oor vee of gewasse wat 16 tot 20 weke duur.
Zokwana het gesê dié vaardighede wat aangeleer word, sal van groot nut vir die land wees.
