Altesaam 83 suiwelvervaardigers het 854 produkte vir die SA Suiwelkampioenskap ingeskryf. Die kampioenskap is die oudste van sy soort in die land en is die enigste ter wêreld wat vyf beoordelaars per kategorie gebruik “ten einde ’n meer akkurate uitslag te bekom”, luidens ’n mediaverklaring van Agri-Expo.
Die kampioenskap toon jaarliks groei, met 13 eerste deelnemers vanjaar, asook vorige deelnemers wat vir die eerste keer produkte in ander klasse inskryf. Agri-Expo bied die kampioenskap al sedert 1834 aan.
“Alhoewel dit die oudste suiwelkampioenskap in Suid-Afrika is, hou ons tred met behoeftes deur gereelde konsultasies met die bedryf. Daar is dan vanjaar twee nuwe klasse toegevoeg tot die kampioenskap vir melk en UHT-melk. Hiermee is die kampioenskap nou volledig met nege katagorieë en 102 klasse vir eindprodukte in die verwerkingslyn van die suiwelbedryf,” sê mnr. Johan Ehlers, hoof uitvoerende beampte van Agri-Expo.
Die beste suiwelprodukte in die land word op 17 Maart tydens die Qualité-toekenningsdinee in Kaapstad aangekondig. Besoek www.cheesesa.co.za of kontak Agri-Expo by admin@agriexpo.co.za of 021 975 4440 vir meer inligting.
