Die Mededingingskommissie het op ‘n aanbevelingsbasis bevind dat die SA Melkverwerkersorganisasie (SAMPRO) aan die mededingingswet voldoen.
Luidens ‘n verklaring het die bedryfsorganisasie in Augustus dié jaar ‘n versoek aan die kommissie gestuur om sy grondwet, beleid en alle kwartaallikse en jaarlikse verslae na te gaan.
Dít het gevolg ná ‘n besluit tydens ‘n algemene vergadering op 17 Augustus dat die kommissie versoek moet word om dié organisaie te adviseer oor of die prys en volume inligting wat tans deur die SAMPRO forum deurgegee word binne mededingswetgewing val, al dan nie.
Mnr. Alwyn Kraamwinkel, hoof uitvoerende beampte van SAMPRO, sê hulle het die kommissie gevra om al hulle interne dokumente na te gaan en vas te stel of hulle die wet reg verstaan en binne die wet optree.
Redes
Volgens Kraamwinkel het dié besluit gevolg ná talle berigte verskyn het wat in die algemeen bedryfsorganisasies se versoenbaarheid met die mededingingswet bevraagteken het. “Mens moet onthou dat daar wesenlike verskille tussen al die organisasies bestaan en mens moet na elke organisasie se agtergrond kyk. Elkeen se grondwet, produkte, en so aan, verskil”.
Kraamwinkel sê volgens die kommissie se antwoord verstaan SAMPRO die wet korrek en tree hy binne die wet op.
Volgens die verklaring lui die kommissie se bevindinge soos volg:
“Die komissie bevind dat SAMPRO se verstane en interpretasie van die Wet nie in konflik is met die bestaande uitvoering is nie. Die Kommissie is van mening dat die inligtinguitruiling van SAMPRO na sy lede nie ‘n invloed sal hê wat nie-mededingende uitkomste binne die suiwelbedryf te fasiliteer nie…”.
22 November 2010
