Terwyl menseregteskendings in Zimbabwe onverpoos voortduur, hang daar nou ook ’n vraagteken oor die toekoms van die Suider-Afrikaanse Ontwikkelingsgemeenskap (SAOG) se tribunaal, die streekhof wat Zimbabwe vir sy optrede veroordeel het.
Op die onlangse leiersberaad van die SAOG is daar besluit dat die rol en funksies van die tribunaal oor die volgende ses maande hersien moet word. Mnr. Athol Trollip, parlementêre leier van die DA, sê egter hy het betroubaar verneem dat die regters van die tribunaal van hul magte ontneem is.
“Die DA kan onthul dat die termyne van die tribunaal se regters nie deur die SAOG hernu is nie. Dié stap kom in effek daarop neer dat die tribunaal ontbind is,” het hy gesê. Hy beskou die hersiening van die tribunaal se rol en funksies bloot as ’n rookskerm om die ontbinding te verbloem.
Trollip beweer daardeur het die SAOG verseker dat die tribunaal nie verder oor die optrede van Zimbabwe se regering kan beslis nie en dat pres. Robert Mugabe se belange onbepaald beskerm word.
’n Beslissing in 2008 dat Zimbabwe se omstrede grondhervormingsprogram onwettig is en dat boere vergoed moet word, word steeds geminag. Trollip sê die SAOG se optrede is ’n duidelike poging om wet en orde in die streek te ondergrawe. Bevestiging oor die regters se ampstermyne kon nie by die tribunaal se sekretariaat verkry word nie.
8 September 2010
