Die Suid-Afrikaanse Polisiediens (SAPD) sal voortaan in beheer wees van die beplanning, bestuur en onderhoud van hul eie stasies.
Dít volg na ’n aankondiging dat skoonmaak en bewaking deel gaan word van SAPD-lede en reserviste se take. Dié inligting is aan die Demokratiese Alliansie verskaf ná die party in die parlement vrae daaroor gestel het.
Me. Dianne Kohler-Barnard, DA-verteenwoordiger, sê die Polisie kan reeds nie die hoë vlakke van misdaad in die land hanteer nie. “Hoe meer polisie-offisiere gedwing word om niekern-verantwoordelikhede te vervul, hoe minder veilig sal die Suid-Afrikaanse publiek wees.”
Volgens Kohler-Barnard het sy in Mei vanjaar die Departement van Openbare Werke gevra hoeveel polisiestasies vanjaar en volgende jaar gebou gaan word. Die antwoord wat aan haar verskaf is, is dat die beplanning, verkryging, bestuur en instandhouding van polisiestasies nou aan die SAPD oorgedra is.
Verantwoordelikhede
Die bestaande mandaat van die SAPD is om misdaad te voorkom, beveg en te ondersoek; om die openbare orde in stand te hou, om die landsburgers en hul eiendom te beveilig en om die wet te handhaaf.
Die Tesourie het volgens die DA ook bepaal dat die SAPD 9 000 lede deur middel van natuurlike uitvloei moet verloor – “so hoe gaan hulle argitekte, ontwerpers, landskapargitekte, bouers en almal nodig vir bouwerk huur?”
Kohler-Barnard sê sy sal dié antwoorde opvolg met vrae aan mnr. Nathi Mthethwa oor waar die finansiering vir dié verantwoordelikhede vandaan gaan kom, en wie verantwoordelik is vir die mandaat.
