Sasol kan ‘n dagvaardiging van die TLU SA verwag oor skadevergoeding wat boere gely het in die samespanning-debakel in die kunsmisbedryf.
Die TLU SA sê in ‘n nuusverklaring hy is uiters teleurgesteld in Sasol se houding oor die poging van die unie om dié aangeleentheid sonder enige litigasie op te los.
Mnr. Bennie van Zyl, hoofbestuurder van die TLU SA, sê Sasol het aanvanklik aangedui dat boere met regmatige eise vir die skade weens die samespanning in die kunsmisbedryf vergoed sou word.
“Nieteenstaande volle bekendmaking en verskeie gesprekke deur die TLU SA het Sasol dit nie eens waardig geag om met enige redelike teenvoorstel en in die belang van die landbou die saak af te handel nie. Met hierdie optrede dwing Sasol die boere wat eise instel om die hof vir bepaling van skade te nader,” sê Van Zyl.
Boere wat 1996 tot 2004 kunsmis by Sasol gekoop het, kan die TLU SA voor einde Maart kontak.
* Sasol het op Graan SA se pas afgelope kongres ‘n landboutrust van R30 miljoen bekend gemaak wat die mededingendheid van die landboubedryf moet ondersteun.
9 Maart 2012
