Die tyd is hier om kommentaar te lewer op die Wetsontwerp op Kommunale Grondregte wat deur die Departement van Landelike Ontwikkeling en Grondhervorming saamgestel is. Dié wetgewing wil die grondregte van gemeenskappe hervorm deur die institusionele gebruikregte van grond deur individuele huishoudings te verseker. Kommentaar kan tot 7 September op die wetsontwerp gelewer word.
Terwyl Suid-Afrika se grondhervormingsproses teen ’n slakkepas vorder en met korrupsie en ongerymdhede besaai is, het die grondkommissie vir Afrika vir die eerste keer vergader. Lidlande van die Afrika-Unie het in 2009 onderneem om wetgewing rakende grond te formuleer sodat alle grondgebruikers, insluitend die jeug, vroue en ander grondloses en kwesbare groepe, gelyke toegang tot grond het.
Verbruik en sekerheid
Die rede vir dié stap is dat hoewel grondkommissies op die vasteland erkenning gee aan gemeenskapsgrond, geniet gemeenskappe nie dieselfde regte as die staat of private inidvidue wat titelaktes het nie. Die kommissie het by sy vergadering in Ghana besluit dat gelyke regte, onteiening, toegang tot krediet en grondsertifikate wat regsbindend is aandag moet geniet om die ongelykhede rondom grond om te swaai.
Mnr. John-Peter Amewu, Ghana se minister van grond en natuurlike hulpbronne, het luidens ’n verklaring gesê dat hoewel die vasteland die meeste grond het wat geskik is vir landboubedrywighede, is sy gapings in produktiwiteit die hoogste. “Ons sien ongelyke grondeienaarskap en grondloosheid wat toeneem in baie Afrika-lande en vroue, wat die meeste primêre produseerders is, word beperk deur gewoontereg.”
Hy het toegegee dat grondkwessies en –stelsel baie kompleks en divers is en daarom is daar ’n behoefte aan omvattende beleid om die toegang, gebruik en bestuur van die grondhulpbronne in die verskeie Afrika-lande te formuleer. Die verblyfregstelsel wat op gewoontereg gebaseer is, bly die dominante verblyfreg-regime op die vasteland en maak gemiddeld 70% van die grondregte in elke land uit.
