Die samewerkingsooreenkoms waarmee die landboumaatskappye Senwes en MGK die landbousakewêreld op sy kop wou keer, het deur die mat geval.
Mnr. Ben Lombard, besturende direkteur van MGK, sê een van die voorwaardes van die transaksie was dat die Mededingingsowerhede dit voor 31 Mei vanjaar moes goedkeur.
“Die datum is uitgestel tot 31 Augustus, maar steeds is die sperdatum nie nagekom nie. Die transaksie het gevolglik deur die mat geval.” Hy sê dit is onseker of die owerheid wel die transaksie sou goedkeur indien die sperdatum vir voldoening verder uitgestel is.
Doelwitte
Mnr. Francois Strydom, uitvoerende hoof van Senwes, sê die transaksie het ’n tydsraamwerk bepaal waarbinne sekere doelwitte bereik moes word. “Die regulatoriese goedkeuring moes binne ’n bepaalde tydperk gebeur − en dit het nie gebeur nie.”
Daar is maande lank voor en agter die skerms oor dié baanbrekertransaksie gepraat. Senwes sou daarmee ’n aandeel van 49% in MGK bekom en die ondernemings se graanbedrywighede sou voortaan onder die Senwesvaandel bedryf word.
Terselfdertyd sou MGK die bedrywighede van Senwes se handelstak op Vaalharts oorgeneem het omdat dit beter by dié maatskappy se ingesteldheid op besproeiing gepas het.
Strydom sê MGK kan in die toekoms steeds besluit om ’n vennoot te verkry om sy beoogde strukturele veranderinge te bewerkstellig. Hy wou nie sê of Senwes weer bereid sal wees om by die transaksie betrokke te raak indien dit weer voor sy deur geplaas word nie. “Ons sal maar moet kyk wat die toekoms inhou.”
Onderhandel
Was die transaksie betyds goedgekeur, sou Zeder Beleggings en Temo Agri Investments (MGK se swart ekonomiese bemagtigingsvennoot waarin Thembeka ’n belang het) hul belange in MGK aan Senwes verkoop.
Lombard sê MGK se ander groot aandeelhouers, die SA Besproeiingskorporasie (voorheen bekend as MGK Beherend en onder beheer en leiding van besproeiingsboere) en Intrax Investments 240 (’n maatskappy onder beheer van MGK-personeel), is tans in onderhandelinge betrokke waarvolgens die belange van Zeder Beleggings in MGK, asook die belange van Thembeka in Temo Agri Investments verkoop sal word.
“Dit gaan goed met MGK. Die onderneming het nie ’n reddingsboei nodig nie. Die afgelope aantal jare se groeistrategie was suksesvol en dien as hoeksteen vir die toekoms. MGK se boere klante, personeel en SEB-vennote is opgewonde oor die belowende vooruitsigte wat die groep bied.”
30 November 2011
