Senwes het met ‘n veldtog begin om mielies aan geknelde boere in die Oos-Kaap te skenk.
Agri Oos-Kaap het onlangs ‘n versoek om droogtehulp aan Senwes gerig en dié maatskappy het besluit om te help deur middel van die fasilitering van die skenking van laer graad-mielies. Al wat nou kort, is die helpende hand van produsente.
Weens die knellende droogte in die Oos-Kaap is daar ‘n geweldige nood vir voermielies en produsente in die Vrystaat en Noordwes word gevra om een (of meer) ton laer graad-mielies aan dié droogtegeteisterde gebied te skenk. Senwes en Grainovation subsidieer die vervoer van dié mielies na produsente in die Oos-Kaap.
Mnr. Nico Smuts, bestuurslid van Agri Oos-Kaap, sê hy kan nie anders as om uit te reik om sy mede-produsente, in veral die Queenstown- en Cathcart-distrikte, te probeer help nie. Volgens ‘n fotosintese-kaart van die Departement van Landbou, kwalifiseer dié streek nie vir hulp van die staat nie en toestande vererger daagliks.
“Toestande het tans so versleg dat produsente besig is om van hul teelkuddes ontslae te raak,” sê hy. “Dragtige diere word gespuit om te aborteer omdat hulle nie die krag het om die kalf te dra nie. Finansiële verpligtinge moet nagekom word, maar ons moet ook probeer oorleef.”
Om mielies te skenk, skakel Wimpie Bouwer by 083 273 7850 of 018 464 7256 en/of Hennie du Plooy by 083 388 4968 of 056 817 6428.
2 November 2010
