Jongboereis deur Senwes by sy Jongboer Toekomsfokusdag aangesê om saam te staan in die onseker en uitdagende tye waarin produsente hulself tans bevind.
Mnr. Danie Minnaar, ondervoorsitter, het verskeie tendense uitgelig wat in die toekoms ‘n direkte uitwerking op jongboere gaan hê. Volgens Minnaar moet produsente kennis neem van die groeigeleenthede in Afrika, Oos-Europa, Brasilië en Argentinië.
Mnre. Roelf Jacobs, voorsitter van Vrystaat Landbou se jongboervereniging, en Francois Coetzee, voorsitter van Agri NW se jongboervereniging, meen die doel van die dag is om jongboere te bemagtig, sodat hulle meer produktief en ingelig kan boer.
“As individuele produsent kan ek en jy nie veel uitrig nie, maar deur saam te staan kan ons deel wees van die toekoms en voortbestaan van die landbou. Al hoe ons dié doel gaan bereik is deur georganiseerde landbou,” het Roelf gesê.
Dr. Kobus Laubscher, hoofbestuurder van Graan SA, meen dit is belangriker om jou oog op die horison te hou, as om net te kyk waar jy nou loop. “Om die toekoms tegemoet te gaan moet leierskap en balans aan die orde van die dag wees.”
Op die foto is mnre. Quinton Coetzee, 50/50 Veldfokusaanbieder, Francois Coetzee, voorsitter van Agri NW jongboervereniging, Roelf Jacobs, voorsitter van Vrystaat Landbou jongboervereniging en Danie Minnaar, ondervoorsitter van Senwes.
Hy het verder oor die sewe beginsels om ‘n gebalanseerde lewe te lei gesels. Dié beginsels is jou houding, aanspreeklikheid, verbintenis, ondersteunende verhoudings, dienslewering, persoonlike balans asook beheer en geloof.
Mnr. Kallie Schoeman, besturende direkteur van Schoeman Boerdery, wat oor volhoubare graanproduksie gesels het, meen daar is sekere beginsels vir oorlewing. “Jy moet so goed wees soos die beste en beter as die meeste,” was sy antwoord.
Die dag was afgesluit deur mnr. Pieter Geldenhuys, voorheen van die Instituut vir Tegnologie en Innovasie van die Noordwes-universiteit, wat jongboere ‘n toekomsblik gegee het op die tegnologie van die volgende dekade.
23 September 2010
