Ses verdagtes word tans ondervra oor die moorde van mnr. Attie Potgieter, sy vrou Wilna, en sy drie jarige dogter, Willemien, op die plaas Tweefontein tussen Lindley en Steynsrus in die Vrystaat.
Sers. Majang Mosupa sê die eerste verdagtes is omstreeks 14:30 Donderdagmiddag (2 Desember) aangekeer. Die grusame moorde is die oggend om 08:45 by die Polisie aangemeld.
Drie van die verdagtes is plaaswerkers, en een is ‘n plaaswerker van ‘n naburige plaas. Die ander twee verdagtes is woonagtig in die informele nedersetting van Lindley. “Hulle is tans in aanhouding vir ondervraging, maar nog niemand is op aanklagte van moord in hegtenis geneem nie,” verduidelik Mosupa.
Die voorval
Potgieter en sy gesin is vermoedelik Woensdagaand vermoor, maar hul liggame is eers Donderdagoggend gevind. Mosupa sê Potgieter se lyk is buite die huis gevind, terwyl sy vrou en kind se liggame in hul slaapkamer gevind is. Hy is vermoedelik doodgesteek terwyl sy vrou en kind elk ‘n kopwond gehad het.
Die Polisie het nog nie besonderhede bekendgemaak oor wat presies gebeur het nie. Mnr. Kobus Breytenbach, voorsitter van Vrystaat Landbou se veiligheidskomitee, sê volgens die inligting wat hy ontvang het, het Potgieter glo drie verdagte mans by sy hek opgemerk, maar hy weet nie wat daarna gebeur het nie.
Mosupa sê hy is nie seker of nog verdagtes by die saak betrokke is nie, maar dit sal duidelik word soos wat die ondervraging voortgaan.
3 Desember 2010
