KwaNalu en die polisie het boere van KwaZulu-Natal verlede
week gewaarsku teen verdagtes in polisie-uniforms wat plase aanval.
Landbou.com het verlede week berig vier plase in KwaZulu-Natal en die Oos-Kaap is die afgelope weke aangeval deur rowers wat hulself as polisiebeamptes voorgedoen het.
Volgens WhatsApp-boodskappe van landelike veiligheidsgroepe is drie plase in die suide van KwaZulu-Natal in die distrikte Port Shepstone, Swartberg/Franklin en Kokstad die afgelope dae aangeval. ’n Plaas in die distrik Addo in die Oos-Kaap is ook verlede week deur aanvallers in polisie-uniform aangeval.
Dieselfde groep?
Ses mans, tussen die ouderdomme van 40 en 42, is gisteraand in hegtenis geneem nadat hulle ’n boer en sy vrou in die distrik Franklin aangeval het. Luidens ’n verklaring deur die polisie dui ’n voorlopige ondersoek daarop dat dit dieselfde groep mans was wat verlede week (Dinsdag 7 Februarie) dieselfde boer en sy vrou beroof het.
Die boer kon gisteraand betyds hulp ontbied en die aanvallers het van die toneel gevlug in hul voertuig. Die polisie en ander belanghebbers het inligting oor die aanval en aanvallers opgevolg en die ses mans is in verskillende areas in hegtenis geneem.
Tydens die soektog het die verdagtes opgemerk dat die polisie en veiligheidswagte se voertuie hul nade, en ’n skietery het ontstaan. Niemand is tydens die skietery gewond nie.
Die verdagtes het in die rigting van Kokstad en Harding gery. Drie voertuie is op die deursoek en weerkaatsbaadjies van die polisie, 58 patrone en vier ongelisensieerde wapens is in die voertuie gevind. Twee van die wapens wat gevind is, het aan die boer behoort. ’n Saak van roof is tydens die vorige aanval by die Franklin-polisiekantoor aangemeld.
Die ses verdagtes sal môre in die landdroshof in Kokstad verskyn op aanklagte van poging tot moord, poging tot roof, die voordoen as ’n polisiebeampte en die besit van ongelisensieerde vuurwapens en ammunisie.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
