Volgens brig. Motantsi Makhele, polisiewoordvoerder, het die eienaar van die plaas op die lewelose liggame van ses vroue en ’n jong man. Die slagoffers is doodgeskiet. Die motief vir die moorde is in dié stadium onbekend.
Die name van die oorledenes en hul ouderdomme word weerhou tot hul naasbestaandes die geleentheid gehad het om hulle uit te ken.
Lt.genl. Baile Motswenyane, provinsiale polisiekommissaris, wat die toneel besoek het, het opdrag gegee dat alle belanghebbendes deur die aktiveringsplan gemobiliseer word sodat met die misdadigers afgereken kan word.
“Ek het die span opdrag gegee om dag en nag te werk. En laat ek die misdadigers waarsku: Hulle kan hardloop, maar die magtige hand van reg en geregtigheid sal hulle inhaal.”
Enigiemand met inligting oor die moorde word versoek om kol. Ben Bolsiek of die provinsiale eenheid teen georganiseerde misdaad te kontak by 082 466 8530, of Crime Stop te kontak by 08600 10111. Inligting kan ook op die MySAPS-toepassing gedeel word.
Dr. Jane Buys, veiligheidrisiko-analis by Vrystaat Landbou, sê die organisasie veroordeel die brutaliteit van die moorde, waar onskuldige mense op so 'n wreedaardige manier vermoor is, ten sterkste. "Ons vertrou dat die polisie die oortreders vinnig sal opspoor en verseker dat die nodige bewyslas bekom word, sodat hul swaar deur die regstelsel gevonnis kan word."
* Hierdie artikel is aangepas op 18 Julie 2022.
