’n Simbra-koei van die Christie-familieboerdery op die plaas
Rietvlei in die distrik Dundee in KwaZulu-Natal het onlangs haar eienaars
verras toe sy geboorte gegee het aan ’n tweeling, nadat sy net meer as ’n jaar
tevore ’n drieling gehad het.
’n Bul- en verskalf is op 6 Mei gebore sonder probleme of gebreke. Die koei het op 1 Maart verlede jaar drie verskalwers gehad. Die Christie-familie bestuur ’n gemengde boerdery en boer met kommersiële beeste, hoofsaaklik Brahman-kruiskoeie.
Me. Lisa Christie boer saam haar pa en oupa, mnre. Danie en Martiens Christie, op hul plaas, geleë in die De Jagersdrift-omgewing naby Dundee in KwaZulu-Natal. Danie is verantwoordelik vir die saai-afdeling, terwyl Lisa by die vee betrokke is.
Sy sê die koei is een van haar oupa, Martiens, se Simbra-koeie wat hulle ’n paar jaar gelede gekoop het. Die koei is agt of nege jaar oud.
Die spesifieke koei het haar eienaars verras met haar vyf kalwers binne twee jaar. “In die meer as 50 jaar wat my oupa boer, het hy nog nooit so ’n verskynsel gesien nie,” sê Lisa.
