Hy sal sir David Graaff altyd onthou as ’n gasvrye man wat diep wyshede kon kwytraak terwyl hy rustig aan sy bekende kromsteelpyp suig, sê mnr. Jan Vosloo, rasdirekteur van die SA Vleismerinogenootskap oor Graaff (74).
Graaff is volgens sy weduwee, lady Sally Graaff, vreedsaam aan kanker oorlede na ’n kort siekbed. Vosloo sê die De Grendel SA Vleismerinostoetery was die heel eerste SA Vleismerinostoetery wat na die stigting van die SA Vleismerino Telersgenootskap in 1950 geregistreer is.
Die boerdery was vir 63 jaar lid van die genootskap tot 2013, toe Graaff die SA Vleismerinostoetery ontbind en met kommersiële kuddediere voorgegaan het. Graaf, soos sy pa en oupa, was baie bekend in Holsteingeledere en die De Grendel Holsteinstoetery, wat meer as 102 jaar oud is en sedert 1912 by die Holstein Telersgenootskap geregistreer is, is
landwyd bekend.
In 2007 is die genootskap se 75 ste-verjaardagvieringe op De Grendel gehou by die nuwe wynkelder op die landgoed. ’n SA Vleismerinokursus en vagkompetisie het daarmee gepaard gegaan. “Hy was baie gasvry en sy plaas se deure was altyd oop.”
Graaff, ook ’n bekende wynmaker, was vir 11 jaar ’n lid van die parlement, was die seun van die kleurryke sir De Villiers Graaff (sir Div, soos almal hom geken het) en die kleinseun van sir David Pieter de Villiers Graaff. Lady Graaff sê hulle was meer as
45 jaar getroud en die egpaar het saam “ ’n vervullende lewe” gehad.
’n Seun, mnr. Robert Graaff van Ceres, is in 2007 as die Jongboer van die Jaar vir die Wes-Kaap, sowel as die Nasionale Jongboer van die Jaar aangewys. Nie algemeen bekend nie, is dat die Graaffs die enigste gesin in Suid-Afrika is wat die aristokratiese titel van baron dra, wat deur koning Edward VII aan die eerste sir David Graaff toegeken is. Die titel gaan nou oor na De Villiers Graaff, die oudste seun.
