Min is bekend oor die potensiële gesondheidrisiko van omtrent 'n derde van die middels wat algemeen in hidrobreking-vloeistof gebruik word, en agt van die middels is giftig vir diere.
Dié bevinding is pas bekend gemaak op die 248ste nasionale vergadering van die American Chemical Society in Washington DC.
Dr. William Stringfellow en sy navorsingspan het 'n wye reeks databasisse en verslae nagegaan om 'n lys middels saam te stel wat algemeen in die proses van hidrobreking gebruik word. Dit sluit die middels in wat die breking-vloeistof verdik, middels wat verhoed dat mikrobe groei, sand wat klein krakies in die rots vergroot, en middels wat keer dat die pype roes.
Hul ontledings van amper 200 middels het gewys die breking-vloeistowwe bevat wel talle nie-giftige en voedselgraad-middels, soos die hidrobreking-bedryf altyd in hul verweer sê.
Stringfellow het egter daarop gewys dat dit nie noodwendig beteken die middels is onskadelik nie. As iets eetbaar of bio-afbreekbaar is, beteken dit nie outomaties jy kan maklik en onskadelik daarvan ontslae raak nie, sê Stringfellow.
“Jy kan nie 'n vragmotor-vrag vol roomys vat en dit deur die drein afspoel nie. Selfs roomys-vervaardigers moet hul suiwel-afval verwerk, wat natuurlik en bio-afbreekbaar is. Dit moet eers afgebreek word, en kan nie sommer net so in die omgewing losgelaat word nie.”
Stringfellow en sy span het op die lys breking-middels agt geïdentifiseer wat besonder giftig vir soogdiere is. Inligting oor die moontlike giftigheid van 34 van die chemiese middels wat hulle geëvalueer het, was nie bekend nie.
Bron: www.phys.org
