‘n Navorsingsverslag wat die voordele van skaliegas-ontginning in die Karoo uitwys, is deur die Treasure the Karoo Aksiegroep (TKAG) verwerp.
Luidens ‘n verklaring sê mnr. Jonathan Deal, voorsitter, die verslag het nie sterk standpunte nie en die navorsing is gebrekkig ten opsigte van die holistiese feite rakende skaliegas-mynwerksaamhede.
“Die feit dat die verslag deur Shell aangevra is laat erge ‘duike’ in die kredietwaardigheid van die dokument. Shell is op dieselfde tyd as wat hy aan die Suid-Afrikaanse publiek vertel het hoe oop, eerlik en deursigtig hy is, oor die vingers getik vir 37 omgewingsoortredings op hidrouliese breking aanlegte in Pennsylvanië in Amerika tussen Februarie en Augustus verlede jaar,” aldus Deal.
‘Groot voordele vir die land’
Die verslag deur Econometrix dui aan dat die ontginning van skaliegas groot voordele vir die land se groeisyfers en werkskepping kan inhou. Volgens Amerika se Energie-administrasie kom 465 triljoen kubieke voet se skaliegas in die suide van die Karoo voor.
Mnr. Tony Twine, senior ekonoom by die Econometrix-groep, asook die leier van die navorsingspan, sê die model wat hulle vir die projek ontwikkel het, is vir die studie op 4% en 10% van die hoeveelheid gas wat wel beskikbaar sal wees, gebaseer. Daarvolgens is bevind dat die ontginning van skaliegas die land se groeikoers jaarliks met R80 miljard of R200 miljard kan opstoot.
Die groep sê dit kan ook ‘n bykomende 700 000 voltydse en deeltydse werksgeleenthede skep. Twine sê dit kan die land ook ‘n hupstoot gee wat die kragkrisis betref. Lees die mediaverklaring in die PDF-dokument hieronder.
'Werkverliese nie genoem'
Deal sê nêrens in die verslag word verwys na werkgeleenthede wat weens die mynaktiwiteite verloor sal word nie. “Die studie lys die voordele, maar dit kwantifiseer nie die koste nie wat dit vir Suid-Afrikaners kan inhou – rakende beskadigde pad infrastruktuur, gesondheidsverliese, herstel van besoedeling en die monitering van die implementering van omgewingstandaarde - om net ‘n paar te noem.”
Volgens Deal sal bevindinge deur studies soos dié nie wetenskaplik water kan hou rakende omgewingsbewaring nie. Verder het me. Susan Shabangu, Minister van Energie, duidelike opdrag van die Kabinet ontvang dat ‘n skoon omgewing en die ekologies nie bedreig mag word nie.
5 Maart 2012
