Wolpryse het skerp op vandeesweek se veiling gestyg ondanks die sterk rand en Cape Wools se Merino-aanwyser het 3,6% hoër op R57,33/kg (skoon) gesluit.
Die veiling is gekenmerk deur sterk mededinging onder vetwoluitvoerders, wat aangedryf is deur toenemende belangstelling uit Indië en goeie vraag uit Europa. Die Australiese mark het ook sedert verlede week verbeter, maar die styging was nie so skerp nie (0,9%).
Die rand het onder die sleutelvlak van R7 teenoor die Amerikaanse dollar verhandel, maar was effens swakker teenoor die euro.
Die sterk vraag het tot ’n hoë verkooppersentasie gelei en 98% van die 6 759 bale wat aangebied is, is verkoop.
Die pryse van feitlik alle tipes het gestyg, maar die fyner tipes het die grootste stygings getoon.
Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron verbeter met 4,8% tot R71,41/kg; 20 mikron was 4,5% duurder op R60,44/kg, 21 mikron styg met 2,2% tot R58,12/kg en 22 mikron verstewig met 3,5% tot R56,64/kg.
Sowat 8 000 bale sal volgende week aangebied word.
30 September 2010
