Sou die veeartse wat verlede week vir renosterslagtings aangekeer is, skuldig bevind word, sal dit vertroue in dié bedryf skaad, sê die TLU SA Noord.
Luidens ‘n verklaring is dié organisasie geskok nadat twee veeartse in verband met dié misdaad aangekeer is.
Die organisasie sê ná dié gebeure is ondernemings wat by die vang, uitdun en verskuiwing van wild betrokke is, skielik ook onder verdenking.
Almal se sake geken
“Volgens die TLU SA Noord was dié veeartse baie bekend in die gebied en het hulle dikwels op boere se plase gewerk. Hulle het die gebied goed geken, het presies geweet hoe die plase se grense loop, waar die boma’s is en ook hoeveel en watter tipe wild op watter plase is. Die ergste is dat hulle presies geweet het wat die optrede van die boere is,” lui die verklaring.
Intussen het mnr. Jan Viljoen, die voorsitter, boere in die provinsie geloof vir hulle samewerking om die misdaad te probeer bekamp. Hy meen dit is veral boere wat in plaaswagte georganiseer is wat ‘n groot bydrae lewer om stroping te voorkom.
Hy sê die Ooste, waar die meeste renosterhoringprodukte verkoop word, moet ingelig word oor die skade wat hulle aanrig en die Chinese regering moet die probleem meer doelgerig hanteer.
Nog drie aangekeer
Intussen is nóg drie wilddiewe die naweek in die Kruger Nasionale Park aangekeer. Luidens ‘n berig op News24.com het wildbewaarders Saterdag op die drie mans afgekom.
‘n Skietgeveg het uitgebreek, en een van die verdagtes is gewond. Twee renosterhorings en wapens is in die mans se besit gevind. Die dier se karkas is ook gevind.
Twee van die verdagtes verskyn Maandag (27 September) in die hof, terwyl die derde steeds in die hospitaal is.
Bron: News24.com
27 September 2010
