Gebreekte toilette, geen toegang tot skoon drinkwater en volwassenes wat klaskamers as verblyf gebruik, is slegs ’n paar van die probleme wat die Demokratiese Alliansie (DA) by ’n plaasskool uitgewys het.
Dr. Wilmot James, woordvoerder vir die party, sê hulle beoog om die Oos-Kaapse departement van basiese onderwys by die Menseregtekommissie (MRK) aan te kla weens die skending van leerders by Lovemore Park Plaasskool se regte.
Luidens ’n verklaring is die skool ’n jaar gelede reeds deur die party en senior amptenare van die departement besoek. Mnr. Stanford Slabbert, ’n DA raadslid, het die inspeksie van die skool gereël. Intussen is nog niks gedoen aan die skool se toestand nie.
Die kwessie is ook na mnr. Mandla Makupula, die Oos-Kaapse LUR vir onderwys, verwys, maar die party het nog geen terugvoering van sy kantoor ontvang nie.
Twee onderwysers
Volgens die party het die skool slegs twee onderwysers. Nóg twee onderwysers is nodig om al die leerders te kan onderrig. Die rekenaarklaskamer is gesluit omdat die skool nie genoeg personeel het om die kinders met die gebruik van die rekenaars te help nie.
’n Voedingskema by die skool is gestaak weens ’n gebrek aan geld. Verskeie klaskamers word tans verhuur aan volwassenes wat daar tuisgaan. Dié mense werk op plase in die omtrek en betaal huurgeld aan die skool.
Me. Annette Lovemore, die party se verteenwoordiger vir onderwys, gaan ook vrae aan me. Angie Motshekga, Minister van Basiese Onderwys, stel om vas te stel hoekom die skool se probleme nie aandag geniet nie, én oor die algemene stand van onderwys in die provinsie.
