Die SA Ontwikkelingsgemeenskaps-tribunaal (SAOG) sou gister (Dinsdag) glo die moontlikheid bespreek dat Zimbabwe as ‘n lidland geskors moet word.
Luidens ‘n verklaring deur Zimbabwe se Commercial Farmers' Union (CFU) word ‘n aansoek deur hulle vandag deur die tribunaal bespreek, en ook oorweeg vir insluiting in die SAOG se beraad.
Die aansoek is gebaseer op die feit dat die Zimbabwese regering voortgaan met ‘n veldtog van arrestasies, vervolgings, tronkstraf en ander vorme van intimidasie wat die lewens van boere en duisende plaaswerkers op kommersiële plase vernietig het.
Die aansoek is deur mnre. Louis Fick, William Micheal Campbell en Richard Etheredge, die CFU en die SA Kommersiële Boere-Alliansie van Zimbabwe ingehandig.
Volgens die verklaring het die tribunaal reeds ná twee vorige aansoeke in dié verband, bevind dat Zimbabwe die SAOG se verdrag nie eer nie. Die eerste aansoek was deur mnr. Mike Campbell en ander teen die Zimbabwese Regering, en die tweede aansoek is ook deur Campbell gebring. In die tweede aansoek is voorgehou dat die Regering nie die eerste uitspraak nakom nie.
Die kwessie is reeds na ‘n SAOG-beraad verwys.
2 Junie 2010
