Slegs 33 van die beoogde 1 695 uitstaande restitusie-eise vir 2009/'10 kon deur die Departement van Landelike Ontwikkeling afgehandel word.
Luidens ‘n verslag van die Navorsingseenheid van die Parlement, was die departement van plan om 1 695 van die 4 560 uitstaande eise in die geldjaar af te handel. Die verslag kan op die Landboubesigheidkamer se webtuiste, www.agbiz.co.za, besigtig word.
Die sny van die begroting van R3,3 miljard na R1,9 miljard het beperkinge veroorsaak en die departement se begroting hiervoor was in die tweede kwartaal van die geldjaar bestee. Alle verdere eise is op ys geplaas tot die 2012/’13 geldjaar.
Die Grondeisekommissie is ook ‘n verdere 10 jaar toegestaan om alle grondeise af te handel.
Herverdeling van grond
Slegs 239 990 ha van die 656 000 ha, waarvoor die departement beplan het, is herverdeel. Dít word ook toegeskryf aan begrotingsbeperkings en die gebruik van geld vir ander projekte en begrotingstekorte wat prioriteit geniet het.
Die departement het altesaam slegs 92% van sy begroting vir die geldjaar bestee. Die onderbesteding van 8% word toegeskryf aan ‘n gebrek aan kapasiteit binne die departement.
Die huidige begroting
Wat die begroting vir die 2010/'11 geldjaar betref, het die departement slegs 13% (R851 miljoen) van sy begroting van R6,7 miljard in die eerste kwartaal van die geldjaar spandeer, terwyl die vroeëre beplanning was dat 25% spandeer moes word.
Wat die restitusieprogram aanbetref, het die departement reeds 35% (R552 miljoen) van die geallokeerde geld vir restitusie spandeer, weens die groot aantal uitstaande sake.
Probleme
Van die grootste probleme waaraan die departement se onderbesteding en ander probleme toegeskryf word, is die tekort aan werknemers, veral vaardige bestuurders.
Sowat 4 140 van die departement se 4 890 vakante poste vir die 2009/'10 geldjaar is gevul. Dus is 10,2% van die poste vakant. In die 2008/'09 geldjaar is 16,7% se vakante poste aangeteken.
14 Oktober 2010
