Die Verbuikersforum kan betrek word by wat vermoedelik ondoeltreffende slenkdalkoors-entstof is, sê die Demokratiese Alliansie.
Luidens ’n verklaring sê me. Annette Steyn, die party se verteenwoordiger vir landbou, sê sy gaan ’n skrywe aan die forum rig om te vra dat hulle ’n ondersoek van stapel stuur om te bepaal of Onderstepoort Biologiese Produkte (OBP) die Verbruikersbeskermingswet van 2008 oortree het.
Steyn sê sy gaan ook vrae aan me. Tina Joemat-Pettersson, Minister van Landbou, Bosbou en Visserye, stuur om vas te stel wat die departement aan die saak doen. Sy wil onder meer weet of Joemat-Pettersson bewus is van die situasie, en watter stappe gedoen word om die probleme by die OBP te takel.
Verder gaan Steyn vra of stappe gedoen word om die potensiële gevolge van die ondoeltreffende entstof vir die landbou aan te pak. Sy wil ook weet hoe die departement verseker dat dié siekte bekamp word.
Inentings
Volgens Steyn het voorlopige resultate van ’n ondersoek wat deur Cape Wools SA gedoen is aangedui dat twee entstowwe, Smithburn en Clone 13, nie effektief is nie. Sy sê baie boere ent tans hulle diere in terwyl hulle groot wantroue het in die produk wat hulle moet gebruik.
Ander voer entstof ten duurste van ander lande af in. Dié entstof kan moontlik nie suksesvol wees nie, want dit is nie vir Suid-Afrika se spesifieke toestande ontwikkel nie.
Die Nasionale Beplanningskommissie het die landboubedryf as een van die belangrikste sektore vir werkskepping geïdentifiseer, met 650 000 voltydse werkgeleenthede wat in die sektor bestaan. Steyn sê landelike gemeenskappe kan nie die prys betaal vir staatsinstansies wat nie hul pligte behoorlik uitvoer nie.
3 April 2012
