Die groot verliese wat veeboere verlede jaar in die Karoo weens ondoeltreffende entstof teen Slenkdalkoors gely het, kan nié voor die deur van boere gelê word nie.
Dít is die belangrikste gevolgtrekking waartoe prof. Leon Prozesky, hoof van die patologiedepartement aan die Universiteit van Pretoria se fakulteit veeartsenykunde, in 'n onafhanklike ondersoek gekom het.
Hy het sy bevindinge op ’n vergadering aan boere opAberdeen bekend gemaak. Die private ondersoek na die doeltreffendheid van die bestaande entstowwe teen die siekte word nog afgewag.
Derde voorval in geskiedenis
Dr. Pieter Prinsloo, voorsitter van die Oos-Kaapse Rooivleisprodusente-organisasie (RPO), het aan Landbouweekblad gesê dat dit net die derde keer in die geskiedenis was wat die omvang van die skade só ernstig was. In 1950/’51 het ’n ondersoek getoon dat dit die boere se skuld was dat entstof nie doeltreffend gewerk het nie aangesien die koueketting destyds verbreek is.
“Met die uitbrekings in die 1970’s en in 2009 is boere van alle skuld onthef. Proewe deur Cape Wools by Adelaide het voorlopig getoon dat die bestaande entstowwe nie doeltreffend is nie en dat die vee nie genoeg teenliggame opbou nie. Een rede kan wees dat die virus ’n mutasie gevorm het.”
Volgens Prinsloo het Prozesky erken dat Onderstepoort Biologiese Produkte (OPB) wat die entstof vervaardig, te lank getalm het om op boere se klagtes te reageer en nie dadelik stappe gedoen het om die virus te isoleer nie.
Hy het aan Landbouweekblad gesê die kwessie gaan nou na die nasionale dieregesondheidsforum verwys word. Die RPO gaan intussen ook oorweeg om ’n klagte by die Verbruikersraad in te dien. “Die boere is kwaad. Hulle soek vergoeding, maar ons aanvaar dat verdere bewyse nog voorgelê moet word,” het hy gesê.
24 Februarie 2012
