Sojabone wat skielik in ’n jong groeistadium vrek, het die Landbounavorsingsraad (LNR) aan die raai en navorsers het ’n ondersoek op tou gesit om vas te stel wat die oorsaak is. Vrektes is reeds in dele van die Vrystaat, Noordwes en Gauteng by hulle aangemeld.
Prof. Bradley Flett, senior landbounavorser en plantpatoloog van die LNR se Instituut vir Graangewasse op Potchefstroom, sê hulle weet nog glad nie wat die vrektes veroorsaak nie, maar dit is vermoedelik nie skielike vrek-sindroom (sudden death) wat deur ’n Fusarium-swam veroorsaak word nie. Dit is nog te vroeg vir hierdie sindroom.
Die plante word eerste aangetas by die plek waar die stam en wortels bymekaar kom en dan vrek die plant vinnig. “Ons doen tans toetse in die laboratorium,” het Flett aan Landbouweekblad gesê. Hulle werk op ’n proses van eliminasie en kyk eers na ’n boer se chemiese en kunsmisprogram om te kyk of die fout nie daar lê nie.
Mnr. Gerhard Scholtemeijer, voorsitter van die Proteïennavorsingstigting, sê hul eie ondersoek kon net een geval aan die lig bring, maar dit is vermoedelik stamvrot. Hulle gaan nietemin voort met die ondersoek.
