Sowat 70% van die 276 000 boerdery-eenhede in Gauteng, wat grootskaalse én klein boerderye insluit, word nie as plase benut nie, berig timeslive.co.za
Opkomende boere tel onder diegene wat in die grootste penarie sit met honderde wat moed opgee en verklaar dat die Regering hulle verwerp het en dat hulle oor geen vaardighede of marktoegang beskik nie.
Dié onthulling kom te midde van mnr. Gugile Nkwinti, Minister van Landelike Ontwikkeling en Grondhervorming, se kontroversiële voorstelle dat kommersiële boere die helfte van hul plase aan plaaswerkers moet oordra.
Mnr. Mike Mlengana, voorsitter van die African Farmers Association of SA (Afasa), het na die Regering gekap en gesê sommige plase word bloot as wegbreekbestemmings vir die naweek beskou. Gevolglik word plase wat die potensiaal het om noodsaaklike voedsel te produseer, erg verwaarloos. “Daar is plase wat kaal gestroop en onbruikbaar is. Op plase in KwaZulu-Natal moet boere op hul bure moet staatmaak vir water omdat hulle nie boorgate of damme kan bekostig nie. Die primêre landbou steun swaar op kapitaal. Ondergang volg as dit ontbreek,” het hy gesê.
Die Regering se swak toewysingskriteria het opkomende boere benadeel, sê Mlengana. “Baie plase is aan mense gegee wat niks van boerdery af weet nie, en baie opkomende boere het ook gehawende toerusting gekry wat te duur was vir herstelwerk. Dit hou 'n driekte bedreiging vir voedselsekerheid in.”
Bron: timeslive.co.za
