Vrystaat Landbou het drie finaliste aangewys vir hul Jongboer van die Jaar-kompetisie met die wenner wat op 6 April tydens die jaarlikse jongboerkonferensie in Bloemfontein aangewys sal word.
Sprekers by die geleentheid sal mnre. Jacques Celliers, hoof-uitvoerende beampte van FNB, en dr. Dirk Strydom, Graan SA se bestuurder vir graanekonomie en -bemarking, en die motiveringspreker Myan Subrayan insluit.
Die doel van die kompetisie is volgens 'n verklaring van Vrystaat Landbou om jongboere deur die georganiseerde landbou te bemagtig vir volhoubare groei.
Vanjaar se finaliste is:
Willie Stols
Stols boer byna 11 jaar al op die plaas Gelykvlakte in die Vierfontein-omgewing saam met sy vrou, Wilmien. Dié plaas is reeds 108 jaar in die Stols-familie se besit.
Met 'n visie om sy besigheid meer op presisieboerdery toe te spits, probeer hy om meer doeltreffend en winsgewend te boer.
Sy boerdery bestaan tans uit wit mielies (40%; 450ha), sonneblom (25%; 250ha), met die res verdeel in geel mielies, skape en beeste.
Stols sê jongboere sal in die toekoms verantwoordelik wees om voedselsekerheid in Suid-Afrika te verseker. "Om te oorleef gaan ons winste en verdienste moet verhoog om 'n positiewe bydrae tot oorlewing en die ekonomie van ons land te maak," sê hy.
Mnr. Willie en mev. Wilmien Stols. Foto: Vrystaat Landbou
Johan van Huyssteen
Dié finalis boer saam met sy pa op die plaas Bloekom in die distrik Virginia. Bygestaan deur sy vrou, Juanita, probeer Van Huyssteen om sy eienskappe as perfeksionis en beplanner gebruik om sukses te behaal.
Sy boerdery bestaan uit 2500ha mielies, terwyl hy probeer om 'n kudde beeste met tyd saam op te bou. Hy fokus op volhoubaarheid, effektiewe en presisieboerdery om goeie opbrengste in droë omstandighede te lewer.
Risiko is ongelukkig ook deel van die prentjie. Van Huyssteen probeer wisselvallige produkpryse bestuur deur saam met maatskappye te werk wat die nodige inligting kan verskaf. "Met goeie inligting kan goeie besluit geneem word wat so risiko's beperk," sê hy.
Mnr. Johan en mev. Juanita van Huyssteen. Foto: Vrystaat Landbou
Herman Archer
Archer is reeds vyf jaar 'n merinoboer op die plaas Settlement naby Trompsburg. Hy probeer buite die boks dink met probleme en verkies om eerder met oplossings as klagtes vorendag te kom. Sodoende hoop hy om 'n verskil in sy gemeenskap en in die landbou te maak.
Sy visie vir sy boerdery sluit in om topgehaltewol en -lammers te lewer. Roofdiere, veldbrande en wisselende weersomstandighede is van die probleme wat hy die hoof moet bied om sukses te behaal.
Archer glo jongboere het 'n belangrike rol te speel in die Suid-Afrikaanse ekonomie.
"Jongboere benader die landbou en ekonomie met 'n ander perspektief en dink buite die boks, wat belangrik is om die landbou te bevorder," sê hy.
Mnr. Herman Archer. Foto: Vrystaat Landbou
