Nuwe regulasies vir produksiemetodes, soos “vrylopend” en “organies geproduseerde” landbouprodukte, gaan eersdaags van krag wees.
Die dae wat enigiemand sonder regulering kan aanspraak maak daarop dat ’n produk organies, vrylopend, Halaal of volgens enige ander spesifieke produksiemetode geproduseer is, is straks op ’n einde.
Alternatiewe produksiemetodes
Volgens mnr. Billy Makhafola, direkteur van die voedselveiligheid en gehalteversekering van die Departement van Landbou, is die wysiging van die Wet op Landbouprodukstandaarde (Wet 119 van 1990) om regulasies vir alternatiewe produksiemetodes te vervat, al ver gevorder.
“Die Departement behoort eersdaags dié wysigings aan die Parlement vir goedkeuring voor te lê. Die proses kan van daar ’n tyd lank duur, maar regulering van al hierdie aansprake is op pad. Die regulasies sal ’n bestuursbeheerstelsel bevat, minimum vereistes voorskryf en vereistes vir etikettering bevat.
"Ongeag of die produsent aanspraak daarop maak vir bemarking en waardetoevoeging, of slegs die produk wil onderskei, sal aanspraak op enige alternatiewe produksiemetode aan die nuwe regulering en vereistes moet voldoen,” het Makhafola gesê.
