Die Regering het gewys hy het die politieke wil om die landelike beveiligingsplan te laat slaag.
Die groot toets is hoe dit nou op grondvlak in werking gestel gaan word, sê mnr. André Botha, voorsitter van Agri SA se landelike beveiligingskomitee. Hy het ná ’n komiteevergadering in Pretoria gesê die beleid ten opsigte van reserviste en die landelike beveiligingsplan is afgehandel en wag op finale goedkeuring deur die nasionale kommissaris.
’n Opleidingskedule word nou voorberei om die fase van inwerkingstelling in te lei. “Ons dink dit is net billik dat polisielede bemagtig moet word as ons van hulle verwag om van rigting te verander. Voortaan gaan ons seker maak dat elkeen wat ’n rang beklee en vergoeding daarvoor ontvang, ook daarvolgens presteer.”
Botha sê as daar probleme by ’n polisiekantoor met die toepassing van die plan is, sal dit met die sektorhoofkwartier bespreek word. Daar sal ook verder op provinsiale vlak en tot op nasionale vlak met die plan se vordering verslag gedoen word.
“Die stelsel is daar en alle boere moet dit aanvaar. Daar is nie meer rede om te kla nie. As hulle nie die geleentheid benut nie, gaan hulle die bus verpas.”
Lees meer in Landbouweekblad se uitgawe van 19 November 2010.
12 November 2010
