Miljarde rand van belastingbetalers is die vorige boekjaar deur staatsdepartemente, provinsiale wetgewers en selfs die Parlement vermors.
Die ouditeur-generaal (OG) het in sy ontleding van die boekjaar 2010/’11 aan die Parlement se staande komitee op openbare rekeninge (Skoor) uitgewys dat R26,4 miljard ongemagtig of onreëlmatig bestee of vermors is.
Dit is R4 miljard meer as in die vorige boekjaar. Slegs drie uit 39 nasionale departemente het ongekwalifiseerde (skoon) oudits gekry.
Ondersoeke
Die Departement van Landbou, Bosbou en Visserye is een daarvan, maar die OG het wel ondersoeke na beweerde korrupsie en swak interne kontrole beklemtoon.
Die Departement van Landelike Ontwikkeling en Grondhervorming het “vrugtelose” en “verkwistende” uitgawes van R73,4 miljoen weens rente wat, soos deur die hof gelas, betaal moes word vir die laat betalings van grond wat gekoop is.
Laasgenoemde departement het ook (soos die afgelope paar jaar) ’n gekwalifiseerde oudit gekry oor sy grondoudit wat uitstaande is. Die OG kon nie genoeg en geskikte bewyse vind oor die volledigheid van eiendomme wat in die vaste bateregister aangeteken is nie.
2 November 2011
