Die konsultasieproses oor die instelling van toltariewe op Gautengse paaie moet verleng word, sê die Departement van Vervoer.
Luidens 'n berig in Engineering News sê mnr. Tiyani Rikotso, hoofdirekteur in die kantoor van die Minister van Vervoer: “Ons verstaan dat die Suid-Afrikaanse Nasionale Padagentskap (Sanral) 'n sperdatum vasgestel het, maar kom ons laat mense toe om hul standpunte te opper.”
SANRAL het vroeër aangekondig dat die tolpaaie teen Februarie 2012 in werking tree.
Die tariewe sou ingestel word in ooreenstemming met die verlaagde tariewe wat in Augustus deur die Kabinet goedgekeur is: 24c per kilometer vir motorfietse, 40c per kilometer vir passasiersvoertuie, R1 per kilometer vir medium-groot vragmotors en R2 per kilometer vir swaar voertuie.
Verdere konsultasie
Rikotso sê verdere konsultasie is nodig oor die toltariewe en moontlike alternatiewe. “Ons sê gegewe die voortdurende en oorweldige belangstelling gedurende die eerste fase van die projek, en ten spyte van die afslag wat reeds deur die Kabinet goedgekeur is, moet ons bykomende konsultasieprosesse instel.”
Volgens Rikotso meen hulle die sperdatum moet deur die konsultasieproses gelei word. “ 'n Mens weet nie wat hieruit kan voortvloei nie. Sekere voorstelle maak vir ons sin, soos mense wat voorstel dat 'n deel van die koste by die brandstofheffing ingesluit moet word.”
Die departement is reeds van plan om dié maand oor die kwessie te vergader.
Goeie idee
Intussen sê mnr. Dawie Roodt, senior ekonoom van die Efficient-groep, dit is ironies dat tolpaaie 'n bykomende belastinglas vir verbruikers veroorsaak.
Hy sê in teorie is 'n tolpad 'n goeie idee omdat die gebruiker daarvan daarvoor moet betaal en die geld wat só ingesamel word, behoorlik toegewys en gebruik kan word.
Tans betaal die Suid-Afrikaanse verbuiker, volgens Roodt, egter dubbele belasting vir die land se paaie, want die belastinglas word nie weens tolpadkoste ligter gemaak nie.
Roodt meen wel die voorstel dat dié tolgelde gedeeltelik by die brandstofheffing ingevoeg moet word, is 'n goeie idee. “Dit beteken wel dat hulle verbruikers weer harder slaan met die prys van brandstof, maar dit is waarskynlik die keuse wat ek sou maak.”
Bron: Engineering News
2 November 2011
