Die nuwe stapelgeen, Mon 89034, wat vroeër die jaar in Suid-Afrika geregistreer is, sal vanaf Februarie 2011 geloods word, sê Monsanto.
Die maatskappy het die stapelgeen tydens ‘n mediatoer in Limpopo bekendgestel, asook ‘n nuwe handelsmerk, Genuity, wat as ‘n sambreel-identifikasie vir al Monsanto se produkte sal dien.
Mnr. Gert Heyns, bemarkingsbestuurder van saad en tegnologie, sê die stapelgeen bevat beter stronkboorder-tegnologie. Dit behoort ook deur die seisoen, onder die meeste weersomstandighede, beheer oor beide Busseda fusca en Chilo partellus te bied.
“Dit bied beter beheer oor larwes, want dit bevat ‘n dubbel proteïen samestelling waarvoor larwes nie maklik ‘n weerstand kan opbou nie,” verduidelik Heyns.
Produksievoordele
Produksie kan met die gebruik van dié stapelgeen met tot 10% toeneem en die gehalte van die graan sal hoër wees, sê Heyns. Hy sê dit bied ook kostedoeltreffende en tydige plaagbeheer wat veilig en gesond vir plaaswerkers en verbruikers is.
Dit is ook omgewingsvriendelik en sal die produsent se koolstofspoor verminder.
Volgens Heyns is die geen betyds goedgekeur sodat hulle saad kon invoer vir saadproduksie. “Saadproduksie kan dus nou plaasvind en boere sal die saad dan in die 2011 plantseisoen reeds kan begin gebruik”.
Nuwe handelsmerk
‘n Nuwe handelsmerk wat as ‘n sambreel-identifikasie vir al Monsanto se produkte sal dien, is ook bekend gestel.
Heyns het gesê die handelsmerk, Genuity, sal al hulle handelsmerke soos Roundup Ready en Yieldguard, vir mielie-, soya, kantoen en ander gewasse se produkte, saamvat. Volgens Heyns stel hulle saam met dié handelsmerk ook ‘n ikoonstelsel, Ikonografie, bekend. Die stelsel sal elke eienskap van die betrokke produk op die sakkie saad aandui.
“Die handelsmerk en ikonografie sal voortaan op elke sakkie saad aangebring word, wat dit vir boere en plaaswerkers makliker sal maak om die eienskappe van die produk te verstaan, aangesien dit ook grafies uitgebeeld word,” sê Heyns.
22 November 2010
