Dit is volgens mnr. Gwede Mantashe, minister van minerale hulpbronne en energie. Hy het Dinsdagoggend die openingstoespraak op die Afrika-energie-indaba in Kaapstad gelewer.
“Ons gaan nie wegstap van steenkool nie, dit gaan nog vir baie jare met ons wees. Ons moet eerder begin belê in tegnologieë wat steenkool ‘skoner’ vir die omgewing maak.”
Dit is ook nie net Suid-Afrika en die res van Afrika wat steeds steenkool gebruik om hul basislading te verstewig nie. Duitsland het volgens hom weer begin om van sy steenkoolkragsentrales in te span om krag op te wek weens die gevolge van die Russiese oorlog in Oekraïne.
China bou nou 43 steenkoolkragsentrales, Japan bou 23 en Brittanje het volgens Mantashe ook weer begin om ná 30 jaar steenkool te myn.
Mantashe het onder meer gesê Afrika is ryk aan steenkool, olie en gas en moet die bronne gebruik om energie-armoede op die vasteland aan te pak. “Afrika moet verantwoordelikheid neem vir navorsing oor groen energie wat op die vasteland ingespan kan word om energie aan die mense van Afrika te verskaf.”
Mantashe het benadruk dit is belangrik om pragmaties te wees wat die kragsituasie in Suid-Afrika en die vasteland betref. “Ons is ’n ryk vasteland, maar ons kan nog baie meer van ons hulpbronne ontwikkel. Dit help nie ons polariseer die debat oor energie nie. Ons kan nie net wegdoen met steenkool nie, daar moet ’n balans op die vasteland gevind word tussen steenkool en hernubare energie.”
Mantashe het ook gesê Afrika moet begin om die Europese Unie (EU) en ander ontwikkelde lande se resolusies oor hoe Afrikalande energie gebruik teenstaan. Hy het verwys na die EU-resolusie oor Uganda wat aandring dat dié Afrikaland nie sy eie oliereserwes mag gebruik nie.
‘Korrupsie is oral’
Wat korrupsie binne die steenkoolbedryf betref, het Mantashe gesê “korrupsie is oral en nie net in steenkool nie. Daar is selfs korrupsie binne die hernubare-energie-omgewing.”
Hy het skaars met sy toespraak begin toe ’n paar lede uit die gehoor voor hom gaan staan het met plakkate wat steenkool en korrupsie in dié bedryf veroordeel. Mantashe het gesê die optrede pla hom nie in die minste nie. Hy het daarop aangedring dat die stille betogers nie weggeneem moet word nie. Hulle het tot die einde van sy toespraak voor hom gestaan.
Wat Suid-Afrika se beurtkragpenarie betref, het Mantashe gesê elke steenkoolkragsentrale se opwekkingsvermoë moet individueel aangepak word.
“Ons moet ook die verkryging van noodkragvoorsiening bespoedig en krag vanaf ons buurlande invoer.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
