Die sterker rand en die swakker gehalte van die aanbod het sybokhaarpryse op die laaste veiling van die 2016-seisoen onder druk geplaas. Die prys van kleinbokkiehaar het met 2,6% gedaal, terwyl jong en fyn grootbokhaar met onderskeidelik 3% en 2% goedkoper was.
Die prys van sterk grootbokhaar het egter met 2% gestyg. Die gemiddelde markaanwyser wat met 1,8% tot R185,00/kg teruggesak het, is sowat 15% laer vergeleke met ’n jaar gelede. Die omset op die veiling was net meer as R13,5 miljoen met Samil en Stucken wat gesamentlik 85% (568 bale) van die aanbod gekoop het.
Die beste prys vir die dag was R335/kg vir ’n baal kleinbokkiehaar van mnr. Charles Fitzhenry van Aberdeen. Waarnemers is bekommerd oor die droogte, wat besig is om rampafmetings aan te neem in die produksiegebied.
Dit kan die gehalte én die hoeveelheid haar nadelig raak. Die eerste veiling van die 2017-seisoen word op 14 Februarie gehou.
