Die skerp styging in die waarde van die rand het op vandeesweek se veiling groot druk op wolpryse geplaas en Cape Wools se Merino-aanwyser het met 4,1% tot R54,53/kg (skoonwol) gedaal.
Die rand het met 2,5% tot sy hoogste vlakke sedert Januarie 2008 teenoor die Amerikaanse dollar gestyg, vergeleke met verlede week se veiling. Die eenheid was ook sterker teenoor die euro.
Daarbenewens het die daling in Australiese pryse verdere druk op die plaaslike mark uitgeoefen. Die Australiese aanwyser met met 1,3% teenoor verlede Woensdag verswak.
’n Totaal van 5 218 bale is aangebied waarvan 96% verkoop is.
Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron het met 2,2% R66,54/kg teruggesak; 20 mikron verswak met 5,7% tot R55,87/kg, 21 mikron was 4,6% goedkoper op R55,67/kg en 22 mikron daal met 6% tot R54,31/kg.
Sowat 7 000 bale sal volgende week aangebied word.
15 September 2010
